Професорите во основното музичко училиште „Боро Џони“ од Струмица, Васко Пиличев и Ана Тимова, добија награди од Здружението на Музички и балетски педагози. Станува збор за награди за истакнати музички педагози, што веќе традиционално ги доделува ова здружение.
Васко Пиличев доби награда за повеќегодишна успешна работа, што подразбира и минимум петнаесет години искуство во областа. Професорката Ана Тимова, пак, доби награда за едногодишна успешна работа. Освен во овие две категории се доделува и награда за животно дело. Ваква награда доби истакнатиот македонски композитор од Радовиш, Стојан Стојков.
Поради пандемијата, годинава во Музејот на македонската борба се доделија наградите за две години. Струмичките наградени професори, Тимова и Пиличев, инаку вработени во основното музичко училиште „Боро Џони“, се всушност добитници за претходната година.
Доделувањето на наградите беше придружено и со свечен концерт.
Овие награди се доделуваат од 2004 година. Васко Пиличев ја има добиено и наградата за едногодишна успешна работа за учебната 2012-2013 година.
