Одделението за внатрешни работи Радовиш поднесе кривична пријава до Основното јавно обвинителство Радовиш против Е.Г. (35) и С.И. (41), двајцата од село Бучим, и Ј.В. (62) од село Лубница, Oпштина Конче. За Е.Г. постои основано сомнение дека сторил кривични дела „пустошење на шума“, „фалсификување на знаци за обележување на стоки, мери и тегови“ и „вршење јавен превоз без поседување лиценца“, С.И. сторил кривично дело „помагање“ во врска со кривично дело „пустошење на шума“, а Ј.В. сторил кривично дело „несовесно работење во службата“.
„Лицата Е.Г. и С.И., со цел да прикријат пустошење на шума на државни парцели, се договориле С.И. да склучи договор со Н.Д. од Радовиш, сопственик на приватни шуми на место викано „Горна Враштица“, атар на село Дамјан, радовишко, за сеча и продажба на огревни стебла од парцели на Н.Д., кои граничат со државните парцели. Откако го склучиле договорот, Е.Г. во име на Н.Д. поднел барање за одобрение за сеча, при што од ЈП „Национални шуми“ – подружница „Плачковица“ Радовиш му се издадени одобренија за сеча во катастарските парцели на Н.Д.“, соопшти министерството за внатрешни работи (МВР).
Во дописот на МВР се додава дека во периодот од јули до септември 2023 година, Е.Г. во 10 катастарски парцели, сопственост на Република Северна Македонија, извршил бесправна сеча на 78,07 кубни метри дабово огревно дрво, со што нанел штета од 642.859 денари на Република Северна Македонија.
„Дел од бесправно исечените дрва ги обележал со жиг, кој по карактеристиките не одговара на формата и назнаките на оригиналниот жиг. При транспортот на дрвата, полициски службеници од ОВР Радовиш го запреле товарното возило „фиат“ со радовишки регистарски ознаки, управувано од Е.Г., при што било констатирано дека врши превоз без да поседува лиценца“, информираат од МВР.
Третопријавениот Ј.В., нагласуваат од МВР, при вршењето на неговите овластувања на работното место референт за сеча, дотур и превоз за приватни шуми, несовесно постапил во вршењето на своите овластувања и должности. Тој, според МВР, изготвувал испратници за превоз на огревно дрво на име на првопријавениот Е.Г. и покрај тоа што одобренијата за сеча биле издадени на име на Н.Д. и на тој начин му овозможил на Е.Г. да изврши сеча на вкупно 155,15 кубни метри дабово огревно дрво, со што се стекнал со противправна имотна корист од 652.405 денари.
