Најдоцна до понеделник ќе се знае дали ќе се поништи изборот на директор во Центарот за култура Антон Панов во Струмица или ќе остане одлуката Бубев да биде раководител на ова институција. Денеска во Скопје незадоволните актери од струмичкиот театар се сретнаа со Министерката за култура Ирена Стефоска токму поради изнаоѓање на решение за проблемот
„Откако ги сослушав си дадовме време да го најдеме најдоброто решение во интерес на драмскиот ансамбл и Центарот за култура „Антон Панов“ во Струмица. Им благодарам што со нивната гласност ми помагаат и мене и на сите културни работници во земјата, новиот Закон за култура кој е во процедура што побрзо да биде донесен, бидејќи во тој закон меѓу новитетите е и еден од условите за станување на раководител на институција, а тоа се високите стручни квалификации во областа. Согласно постојниот Закон формално- правната процедура е испочитувана од Комисијата во Министерството по што е направен изборот. Затоа новиот Закон треба што побрзо да се донес“, посочи Министерката Стефоска по средбата.
Актерите останаа на позицијата за поништување на изборот и распишување на нов конкурс за директор на НУЦК Антон Панов во Струмица
„Нашата позиција е дека не отстапуваме од барањето да се оди во насока на отповикување на поставениот директор и раскинување на конкурсот со што би се дало можност и шанса да се пријават други посоодветни кандидати. Исто така ако до понеделник разговорите не одат во насока на нашата ултимативна цел да биде сменет поставениот директор ќе пристапиме кон порадикални мерки како непослушност и протести“, додаде актерот Стојан Велков.