Македонскиот премиер Димитар Ковачевски и бугарскиот премиер Кирил Петков имаат заеднички став дека во отпочнување на преговорите на Македонија со ЕУ, ќе се се намали можноста за нестабилност во регионот. Додека Ковачевски вели дека нема конкретен документ за кој може да се разговара во рамките на институциите, Петков упати порака до историската комисија: „Имам добри вести, некои работи кои беа тешки да се надминат, сега има реална можност за надминување“.
„Во врска со политичките прашања, министерствата за надворешни работи работат. Се на ниво на размена на документи. Уште нема конечен документ за кој сме договорени. Штом се случи тоа, ќе го споделиме со релевантните институции во двете земји. Потенцирав дека проширувањето на ЕУ во суштина станува безбедносна политика и дека застојот во овој процес создава дополнителна нестабилност за регионот затоа што има неколку негативни тенденции, создава простор за влијание од трети страни. Одложувањето на пристапниот процес кон ЕУ за земјите од регионот создава дилеми. Тоа може да резултира со намалување на довербата кај граѓаните во ЕУ. Историската комисија работи независно“, кажа Ковачевски.
Петков пак, смета дека по кризата во Украина и војната која ја започна Русија, Западен Балкан мора да биде стабилен.
„Со Димитар работиме многу координирано и со фокусирани распореди и временски рамки, си поставивме неколку одредници кои мора да бидат остварени. Северна Македонија припаѓа во семејството на ЕУ. Што е можно побрзо. Нашата Влада сака да го постигне овој резултат. Имаме неколку одредници, како што се заштитата на правата на малцинствата. Во блиска координација сме со европските партнери, кои служат како трета страна во преговорите. Очекуваме специфичен јазик на кој заедно ќе работиме во преговорите. Се надевам дека ќе го постигнеме резултатот. Историски, многу е подобрен нашиот однос во последните три месеци. Имаме заедничка цел.
Комисијата за историски прашања ме извести за некои важни историски личности и нивниот третман. Ќе ви дадам некои детали. Дојдовме до напредок по тие прашања за историските личности, на многу конструктивен начин. Тоа отвора можност за забрзување на нашите преговори. Секако ќе ми треба прво да добијам и моите партнери целосен извештај од комисијата, па штом го добиеме тоа ќе оди брзо“, Петков.