Група струмичани кои секојдневно рекреираат по трим патеката од Ловен дом до Св. Илија повторно со писмо до нашата редакција реагираат на безмилосната сеча на дрвцата покрај патеката и неажурноста на одговорните институции да се справат со бесправната сеча над градот. Тврдат дека е извршен нов масакр на локалитетот ,,Ладната воичка’’ и покрај завчерашните предупредувања но и многуте пријави до институциите. Очекуваат наредниот период да се превземаат конкретни мерки со зачестени контроли на овој потег, со цел да се спречи уништувањето на шумскиот фонд. Тврдат дека тоа е група од 5-6 луге од ромската заедница кои секојдневно со колички вршат сеча, под изговор дека собираат суви гранки .Најавуваат и протести
,, Прво ќе излеземе пред канцелариите на институциите и општината и ќе штрајкуваме а потоа и сами ќе се справуваме со ,,бандитите’’ оти друго решение нема. Несфатливо е одговорните да седат по канцеларии и не превземаат ништо, иако факт е дека секојдневно во утринските часови, се носат дрвја со колички . Ние граѓаните Ве плаќаме со народни пари. Дали сте свесни дека околу Ловен дом и трим патеката има уште малку дрвца’’ стои во писмото – реакција од загрижени струмичани кои бараат од надлежните пенергична реакција
Проблемот со бесправната сеча по трим патеката не е нов. Таму секојдневно се сечаат по неколку дрвја кои потоа со колички се симнуваат до Ловен дом. Доброупатените сметаат дека групата е организирана за да се избегнат контролите. Дел од дрвокрадците биле и насилници кои честопати на рекреативците им се заканувале со физичка пресметка.
Рекреативците бараат со ова предупредувачко писмо да излезат преставниците на институциите на терен и да ја согледат состојбата, оти како што е тргната работата ,,белите дробови’’ на Струмица за некоја година ќе ги нема оти по трим патеката не остана ниту едно дрвце а Струмица од година во година ќе биде се позагадена општина
