Русија поседува потенцијал со кој може да уништи други земји, па затоа таа претставува поголема закана за светот дури и од џихадистичката група Исламска држава (ИД), изјави синоќа полскиот министер за надворешни работи Витолд Вашчиковски.
- Руските активности претставуваат егзистенционална закана за другите земји, нагласи Вашчиковски во обраќање на безбедносната конференција ГЛОБСЕК, што се одржа во Братислава.
Како што јавија полските медиуми, Вашчиковски го повика НАТО да распореди дополнителни сили на своето источно крило, најавувајќи дека на претстојниот самит на Алијансата, што во јули ќе се одржи во Варшава, Полска ќе бара да се донесе официјална одлука за засилено воено присуство на Пактот во источна Европа.