Денеска се одбележува десетгодишнината од стравичниот пожар над Струмица. Пожарот во 2012 година ја зафати боровата шума на планината Еленица која е сместена веднаш над градот Струмица.
Причината за пожарот беше човечки фактор, а истиот бил подметнат во периодот помеѓу 11 и 12 часот на 23 јули 2012 година.
Во пожарот загинаа двајца спасители, вработени во ЈП „Македонски шуми“ и двајца цивили кои доброволно се вклучија во гаснењето на пожарот.
Повредени беа и десетина лица од кои седум деца.
По повод загинувањето на двајцата волонтери и двајцата спасители, во Општина Струмица на 25 јули 2012 година беше прогласен ден на жалост. Исто така, во чест на загинатите на главниот булевар во центарот на градот е изграден споменик од страна на општината, а во близина на местото каде што загинале од страна на фамилиите на загинатите е подигната мала црква-спомен.