Деновиве беше ставен во работа градежната фирма која во рок од една година треба да изврши уредување и регулација на коритото на река Сушица во Радовиш. Станува збор за активности преку проектот „Заеднички мерки за спречување и намалување на последиците од катастрофи во општините Сандански и Радовиш“, финансиран од ЕУ преку Интеррег-ИПА Програмата за прекугранична соработка помеѓу Република Бугарија и Република Северна Македонија.
,,Со овој проект за прекугранична соработка една од главните активности е уредувањето на коритото на река Сушица во должина од 624 метри со што ќе се реконструира најкритичниот дел од реката кој прави големи проблеми при надоаѓање на водите, рече Жулиета Ѓуркова, директорка на Центарот за развој на Југоисточниот плански регион
Со реализација на проект вреден околу 320 илјади евреа е планирано да се изврши чистење на коритото, поставување на каскадни прагови, кејски ѕид, уредување на дното, градење скали и рампи со цел да се создаде пристап до реката и да се намалат негативните последици од поплавите, како и подигање на јавната свест кај населението со вклучување на најмладите преку акција за садење дрвја и пошумување на речниот слив.