Струмичките угостители најавија протест ама денес се пишманија
Протестот кој беше закажан за денес од страна на струмичките угостители, утрово се одложи. Во нивното известување стоеше дека од 11 до 13 часот, секој ден во знак на незадоволство ќе ги блокираат улиците во Струмица, но и влезовите на градот.
Децидни беа дека ги бараат претходните мерки за слободен влез на невакцинирани и вакцинирани.
Не успеавме да ја дознаеме причината поради што се повлекоа и не останаа доследни на повикот за протест, некои во телефонски разговор посочија дека еден по еден почнале да се откажуваат од намерата да ги затворат локалите и да излезат на протест.
Угостителите во известувањето конкретизираа дека во овие години трпат најголеми последици од кризата и дека е време Владата да донесе нови мерки што ќе бидат и во нивна корист. Засега нема нови најави дека оваа фела ќе се излезе на протест или ќе ги затворат локалите во знак на незадоволство од веќе донесените владини мерки.
